Аймақта ветеринар мамандардың жетіспеуі, мал ауруы, ауыл шаруашылығы саласындағы мемлекеттік қолдау шаралары туралы облыс әкімі Нұрлан Ноғаевтың Қызылқоға ауданында өткізген көшпелі мәжілісінде айтылды.

Жергілікті атқарушы органдардың қолдауы арқасында мұнайлы аймақтағы ауыл шаруашылығы саласында соңғы жылдары оң өзгерістер болды. Агроөнеркәсіп кешенінде жаңа жобалар жүзеге асып, бұрын өңірде қолға алынбай келген дайын өнім шығару мен өңдеу ісі бастау алды.

Өткен 2017 жылы облыста мал басы көбейді. Соның ішінде түйе мен жылқы саны 13,5 және 3,6 пайызға дейін артқан. Жиында облыс әкімі мал ауруының, соның ішінде бруцеллездің алдын алуда нақты шаралар қабылдау керектігін айтты. Осы салада мамандар дайындау, тарту, медициникалық препараттар мен вакциналар алу, мал сою цехтарын салу, тұрғындар арасында санитарлық мәдениетті арттыру бойынша кешенді бағдарлама жасауды тапсырды. Мәліметтерге сәйкес мал ауруының 80 пайызы жеке қолдағы төрт түлік арасында кездесіп отыр.

«Бізге мамандар тарту керек. Студенттерді оқытуға грант бөлу жүйесі бар. Қанша грант керек болса, сонша береміз. Бастысы, осы салада білім алуға талаптанатын жастар болуы керек. Жауапты адамдарға ветеринар мамандарды тұрғын үйді жеңілдікпен алушылар қатарына қосатын, басқа да әлеуметтік жәрдемақылар төленетін санатқа қосу мәселесін шешуді тапсырамын»,- деді аймақ басшысы

Мемлекеттік қолдау бойынша аймақта ауыл шаруашылығын субсидиялау он бағдарлама бойынша жүргізіледі. Сол арқылы 720 шаруа қожалығы 2,6 млрд. теңге сомасында мемлекеттік қолдауға ие болған. Бұл бағыттағы жұмыстар Махамбет, Қызылқоға, Құрманғазы аудандарында жақсы жүзеге асып жатыр. Биыл ауыл шаруашылығын субсидиялауға 2,9 млрд теңге бөлінді. Облыс әкімі осы реттегі жұмыстардың қатаң бақылауда болатынын да атап айтты.

«Шаруалар субсидияны уақытылы алып отырулары керек. Мемлекет басшысы ауыл шаруашылығын қолдау қажеттігі жайлы үнемі айтады. Біз қолдаудың қажет кезде және қажет уақытында болуына жағдай жасайық. Кәсіпкерлер проблемаларының шешілу мерзімі ұзап кететініне, субсидия әбден жұмысты бітіріп болған соң ғана берілетініне шағымданбасын. Субсидия шаруаларға әбден аяқталғаннан кейін емес, нақты жұмыс барысы кезінде керек», — деді ол.

Гүлзада Қожабергенқызы

Атырау облысы

ОСТАВЬТЕ ОТВЕТ

Please enter your comment!
Please enter your name here